ТОШКЕНТ — Энди Ўзбекистонда ер участкасининг ҳақиқий майдони ҳуқуқни белгиловчи ҳужжатларда кўрсатилган майдондан 2 фоизгача ортиқ бўлса ва бу фарқ 30 квадрат метрдан ошмаса, мазкур ҳолат ўзбошимчалик билан ерни эгаллаб олиш сифатида баҳоланмайди.
Бу норма Вазирлар Маҳкамасининг 2025 йил 27 майда қабул қилинган “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги Қонунни амалга ошириш бўйича қўшимча чора-тадбирлар ҳақидаги қарорида ўз ифодасини топди.
Янги қоида қандай ишлайди?
Ушбу қарор билан 2021 йил 22 июндаги 389-сонли ҳужжат — “Кўчмас мулк объектларига кадастр йиғмажилдини тайёрлаш тартиби тўғрисидаги низом”нинг 14-банди 8-хатбоши билан тўлдирилди.
Шунга кўра, агар ер участкасининг аниқланган майдони қуйидаги икки шартга мос келса:
ҳуқуқий ҳужжатдаги майдондан 2% гача кўп бўлса, ва
бу фарқ 30 квадрат метрдан ошмаса,
унда мазкур ер солиқ органлари томонидан ўзбошимчалик билан эгаллаб олинган ер сифатида қайд этилмайди ва қонуний тартибда фойдаланиш мумкин бўлади.
Мавжуд қонунчилик доирасида
Эслатиб ўтамиз, 2023 йил 5 август куни Президент Шавкат Мирзиёев “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги Қонунни имзолаганди. Унга мувофиқ, 2024 йил 8 ноябридан бошлаб белгиланган талабларга жавоб берадиган ҳолларда ўзбошимчалик билан эгаллаб олинган ерларга эгалик ҳуқуқи расман тан олинади.
