Оқ кроссовкалар сўнгги йилларда ҳар бир гардеробда бўлиши керак бўлган универсал пойабзалга айланган эди. Улар ҳар қандай услубга мос келади, қулай ва минималистик кўринишда бўлгани учун ҳам кенг оммалашган. Бироқ 2025 йил ёзи мода тенденцияларига янги ранг бағишлади. Vogue журналининг Германия таҳририяти бу мавсумда оқ кроссовкаларга муқобил бўладиган, ҳатто уларни соя остида қолдирувчи рангли кроссовкаларни тавсия қилмоқда.
Нашр ёрқинликка интилувчи кайфиятнинг авж олаётганини таъкидлар экан, айниқса қизил, яшил, пушти, лимон сариқ ва тўқ сариқ ранглардаги кроссовкаларни актуал деб ҳисоблайди. Шунингдек, жигарранг ва кўк каби чуқурроқ, барчага мослашувчан ранглар ҳам бу йилги трендлар қаторида. Мода экспертларига кўра, одамлар замонавий пойабзални нафақат қулайлик, балки шахсий ифода воситаси сифатида ҳам танлашни бошлаган. Бу тенденция, албатта, таниқли брендлар маҳсулотларида ҳам акс этмоқда.
Loewe, Puma, Adidas, Miu Miu ва Nike каби дунёга машҳур брендлар бу йил модага айланган ранг гаммасига эга кроссовкаларни омма эътиборига тақдим этмоқда. Айниқса, Nikeнинг электрик-кўк ва сариқ рангдаги янги моделлари кўплаб ёшлар ва инфлюенсерлар гардеробида пайдо бўла бошлади. Ушбу ранглар нафақат кўзни қамаштиради, балки образга янги руҳ, кайфият ва индивидуаллик бағишлайди.
Албатта, оқ кроссовкалар ҳанузгача ўз мақомини тўлиқ йўқотгани йўқ — улар классик услубнинг муҳим қисми бўлиб қолаверади. Бироқ 2025 йил ёзидаги асосий хабар шундаки: оқ эмас, рангли пойабзал — бу мавсумнинг энг кучли баёноти. Замонавий мода сизнинг кайфиятингиз, жасоратингиз ва сизнинг ким эканлигингизни намоён қилади. Шу боис, агар гардеробингизда фақат оқ кроссовкалар бўлса, уларни бироз четга суриб, рангларга имконият беринг — модада ҳаёт бор, ҳаётда эса ранглар.
