2025/2026-ўқув йили тест синовларида иштирок этиш учун абитуриентларга “Рухсатнома”ларни бериш бошланди. Абитуриентлар рухсатномани my.uzbmb.uz сайти орқали олишлари мумкин.

Олий таълим вазирлиги маълумотича, рухсатномани олиш учун шахсий идентификация рақами ҳамда паспорт серияси ва рақамини киритиш талаб этилади.

Абитуриентлар тест синовига паспорт (ID-карта) ва рухсатнома билан, белгиланган вақтдан кечикмаган ҳолда келишлари лозим.

Паспорт нусхаси ёки бошқа ҳужжатлар билан келган, ёки кечикиб келган абитуриентлар тестга киритилмайди.

Эслатиб ўтамиз, жорий йил учун бакалавриат йўналишларига 732 411 нафар абитуриент онлайн рўйхатдан ўтган. Рўйхатдан ўтиш жараёни якунлангани аввалроқ хабар қилинган эди.