Ўзбекистонда ишлаб чиқарилганига 40-50 йил бўлган автомашиналар босқичма-босқич истеъмолдан чиқарилиши мумкин. Бу таклифни Олий Мажлис Қонунчилик палатаси депутати, «Миллий тикланиш» партияси раҳбари Алишер Қодиров илгари сурди.

Қодиров, шунингдек, автомашина эгалари учун қулай ва манфаатли алмаштириш шароитлари яратилиши лозимлигини таъкидлади. Унинг фикрича, ҳатто 25–30 йилдан ошган машиналарни ҳам қайд этиш имконияти кўриб чиқилиши мумкин.

Депутат йўлларда хавфсизликни таъминлаш учун «қизил чироқда ўтиш», «чекланган жойда икки баравар тезликда ҳаракатланиш» ва «қасддан тартибсиз ҳаракат» каби қоидабузарликлар учун қаттиқроқ жазо чоралари белгиланиши кераклигини билдирди.

Шу билан бирга, давлат хизмат машиналарининг қоидаларга риоя қилмаслиги масаласига ҳам тўхталиб, тартиб ҳамма учун бир хил бўлиши шартлигини урғулади.

Қодиров ички ишлар тизимидаги кадрлар масаласига ҳам эътибор қаратди. Унинг таъкидлашича, ушбу соҳада билимли, профессионал ва жамиятга намуна бўладиган ходимлар ишлаши керак. Таниш-билишчилик асосида ишга қабул қилиш амалиётига барҳам бериш лозим.

«Жамият формадаги ходимлар билан фахрланиши керак», — деди Қодиров ўз баёнотида.

Эслатиб ўтамиз, аввалроқ Президент раҳбарлигида ўтган йиғилишда айрим йўл қоидабузарликлари учун жазо чоралари кучайтирилиши таклиф этилган эди.