Ахборот ва ёзув ишлари билан боғлиқ касблар сунъий интеллект (СИ) таъсирида ишсизлик хавфига энг яқин туради. Microsoft томонидан ўтказилган кенг кўламли тадқиқотда шу аниқланди.

Тадқиқот натижаларига кўра, таржимонлар, тарихчилар, ёзувчилар, муҳаррирлар, техник ёзувчилар ва data scientist’лар — яъни маълумотлар билан ишловчи мутахассислар — биринчи навбатда автоматлашувга дуч келмоқда. Масалан, таржимонларнинг вазифаларининг ярмига яқинини СИ аллақачон бажара бошлаган (индекс — 0.49).

Сунъий интеллект матн ёзиш, таҳрир қилиш, ахборот тайёрлаш ва мижозлар саволларига жавоб беришда юқори самарадорлик намоён қилмоқда. Бу эса жуда кўп ақлий меҳнат талаб қиладиган вазифаларда СИ иштирокини жадал оширмоқда.

Шу билан бирга, инсоннинг жисмоний иштироки талаб қилинадиган касблар — ҳайдовчилар, ҳамширалар, қурилишчилар, дастгоҳ операторлари ва фаррошлар — ҳозирча хавфсиз ҳисобланади. Уларнинг фаолиятида СИ қўлланилиш индекси деярли нолга тенг.

Microsoft тадқиқоти 200 мингдан зиёд анонимлаштирилган фойдаланувчи ва Copilot ўртасидаги мулоқотларни таҳлил қилиб, СИ қўлланувчанлик индекси — янги метрикани яратди. Бу индекс турли касбларда СИ қандай даражада самарали ишлаётганини кўрсатади.

Хулоса қилиб айтганда, СИ фақат келажакда эмас, бугуннинг ўзида касблар табиати ва иш бозорини қайта шакллантирмоқда. У одамларни тўлиқ алмаштирмаса ҳам, баъзи вазифаларда аллақачон самарали ҳаракат қилмоқда.

Мослашган одамлар ютқазмайди. Ё ишдан ажрайсиз, ё СИни ўз йўлингиздаги қуролга айлантирасиз. Танлов — сизники.