Ўзбекистонда қайта тикланувчи энергия манбалари салоҳияти янги босқичга чиқмоқда — июль ойида қуёш ва шамол станциялари орқали ишлаб чиқарилган электр энергияси ҳажми биринчи марта 1,2 миллиард киловатт-соатни ташкил этди. Бу умумий генерациянинг 17 фоизига тенг.

Энергетика вазирлиги маълумотларига кўра, ҳозирги кунда мамлакатда 11 та қуёш фотоэлектр станцияси ва 4 та шамол электр станцияси ишламоқда. Улар мос равишда 760 миллион ва 485 миллион киловатт-соат электр энергияси ишлаб чиқарган.

Шу орқали 377 миллион куб метр табиий газ тежалди ва атмосферага чиқиши мумкин бўлган 1,1 миллион тонна зарарли моддаларнинг олди олинди.

Май ойида қайд этилган аввалги рекорд — 1,1 миллиард киловатт-соат — июль ойида 142 миллион киловатт-соатга оширилди. Бу тенденция Ўзбекистоннинг ҚТЭМ салоҳияти ортиб бораётганини ва энергетика сиёсатидаги муҳим бурилишни кўрсатади.

Маълумот учун: 2022 йилда ҚТЭМ орқали 430 миллион киловатт-соат, 2023 йилда 580 миллион киловатт-соат, 2024 йилда эса 4,9 миллиард киловатт-соат энергия ишлаб чиқарилган. 2025 йил бошидан 2 августгача эса бу кўрсаткич аллақачон 6 миллиарддан ошиб кетди.

Қайд этиш жоиз: "яшил энергия" соҳасидаги бу ўсиш нафақат энергетик мустақилликка, балки экологик барқарорликка ҳам хизмат қилмоқда.