«Миллий тикланиш» партияси етакчиси Алишер Қодиров Женнифер Лопеснинг Тошкентдаги концертидан сўнг аёлларнинг рўмол ўраш ҳуқуқини ҳимоя қилди. У ўз Телеграм-каналида жаҳон юлдузининг саҳна кийими ва диндор аёлларнинг либосларига бўлган муносабатни таққослаб, дунёвий давлатда танлов эркинлиги ҳар икки ҳолатда ҳам таъминланиши кераклигини таъкидлади.

«Биз Женнифер Лопесга қандай кийинишни ўргатмаганимиз каби, диндор аёлларимизга ҳам рўмолни қандай боғлашни ўргатиш шарт эмас», — деб ёзди у.

Қодиров паспортга суратга тушишда рўмолни ечиш талабига қарши чиқди ва шахсни аниқлаш учун очиқ юз етарли эканини билдирди. Унинг сўзларига кўра, дунёвийлик — бу ягона турмуш тарзини тиқиштириш эмас, балки давлатнинг барча мафкуралардан тенг масофада туришидир.

Сиёсатчи, шунингдек, Тошкентдаги пиво фестивалини дунёвий эркинликнинг намунаси сифатида тилга олди: «Ким хоҳласа — пиво ичади, хоҳламаган ичмайди. Танлов сабабини ҳеч кимга изоҳлаш шарт эмас».

Эслатиб ўтамиз, бир неча кун олдин унинг партиядоши Фируза Муҳамеджанова мазкур фестивални «анъаналарга тупуриш» деб баҳолаган ва жамоатчиликни икки томонлама стандартларда айблаган эди.