Тошкент шаҳрида фуқароларнинг банк карталаридан катта миқдорда маблағ ўғирлаш билан шуғулланган “.apk” вирусли дастур яратган жиноий гуруҳ аъзолари қўлга олинди. Бу ҳақда Ички ишлар вазирлиги Киберхавфсизлик маркази матбуот хизмати маълум қилди.

Кибержиноятчилар қандай фаолият олиб борган?

Маълумотларга кўра, “Хавфсиз кибермакон” тезкор профилактик тадбирлари доирасида ўтказилган текширувларда 11 нафардан иборат гуруҳ аъзолари турли давлат фуқароси экани аниқланган. Улар мобил қурилмаларга вирусли “.apk” дастурини тарқатиб, фуқароларнинг шахсий маълумотлари ва банк картаси реквизитларини қўлга киритишган.

Миллиардлаб сўм ўғирланган

Олиб борилган тезкор-техник тадбирлар натижасида жиноий гуруҳнинг 5 нафар аъзоси қўлга олинди. Уларнинг телефонларини текшириш жараёнида 133 нафар шахснинг банк карталаридан 2 миллиард 838 миллион 278 минг сўмдан ортиқ маблағ ўғирлангани маълум бўлди.

Текширув натижаларига кўра, ўғирланган пул маблағлари гуруҳ аъзолари ўртасида тенг тақсимланган.

Жиноят иши қўзғатилди

Ҳолат юзасидан Жиноят кодексининг тегишли моддалари асосида иш қўзғатилди ва гумонланувчилар процессуал тартибда ушланган. Ҳозирда жиноий гуруҳнинг республика ҳудудидаги бошқа шериклари ва жабрланувчилар доирасини аниқлаш бўйича ишлар давом этмоқда.