Президент матбуот котиби Шерзод Асадов ижтимоий тармоқларда Президент Администрацияси ва давлат ташкилотларида штат бирликлари 50 фоизга қисқартирилаётгани ҳақидаги хабарларга муносабат билдирди.
Унга кўра, мазкур маълумотлар расмий тасдиқланмаган. Давлат идораларида штат бирликларини мақбуллаштириш доимий жараён бўлиб, бу бевосита бир-бирини такрорловчи функцияларни қисқартириш, давлат бошқаруви самарадорлигини ошириш ва бюджет маблағларидан тежамкорлик билан фойдаланиш мақсадида амалга оширилади.
«Бу жараённинг аниқ ҳажми ва кўлами тегишли ўрганиш ва таҳлиллардан кейингина маълум бўлади», – дея таъкидлади Асадов.
Шу билан бирга, расмий манбалардан тасдиқланмаган маълумотларни тарқатмаслик, фақат ишончли маълумотларга таяниш сўралди.
