Бугун, 8 сентябрь куни Тошкентдаги “Олимпия” стадионида CAFA Nations Cup 2025 финали бўлиб ўтади. Беллашув соат 19:30 да старт олади ва унда Ўзбекистон миллий терма жамоаси ўзининг азалий рақиби Эронга қарши майдонга тушади.
Бу ўйин икки терма жамоа ўртасидаги тарихий рақобатнинг янги саҳифаси бўлиши кутилмоқда. Чунки охирги тўрт учрашувда ҳам Ўзбекистон, ҳам Эрон бир-биридан устун кела олмаган ва баҳслар дуранг билан якунланган. Бу ҳолат финални янада кескин ва драматик қилишини спорт таҳлилчилари таъкидламоқда.
Ўзбекистон термаси сўнгги бор CAFA-2023 финалида иштирок этган ва ўша пайтда ғалаба имкониятини бой берган эди. Энди эса жамоа тарихий “реванш” олиш ҳамда мусобақа кубогини илк бор қўлга киритиш учун катта имкониятга эга. Турнир 2023 йилдан бошлаб ҳар икки йилда ўтказилиб келмоқда ва иккинчи бор финалда айнан Ўзбекистон ва Эрон тўқнаш келмоқда.
Учрашувнинг аҳамияти нафақат чемпионлик билан чекланади. Бу баҳс Марказий Осиё футболидаги етакчилик учун ҳам муҳим синов ҳисобланади. Финални стадиондан FIFA Президенти Жанни Инфантино ҳам томоша қилади. У бугун Ўзбекистонга ташриф буюриб, Миллий футбол маркази билан танишиш ва ривожланиш лойиҳаларини муҳокама қилишни режалаштирган.
Футбол ишқибозлари учун бугунги финал нафақат спорт байрами, балки Ўзбекистон футболи тарихида янги саҳифа бўлиши мумкин.
