Қирғизистонда мамлакат тарихида муҳим воқеа рўй берди — Жалолобод шаҳри расман Манас шаҳри деб қайта номланди. Президент Садир Жапаров 17 сентябрь куни бу ҳақдаги қонунни имзолади, деб хабар қилди Қирғизистон президенти матбуот хизмати.
Қонун 2025 йил 10 сентябрда Жогорку Кенеш (парламент) томонидан қабул қилинган бўлиб, расмий эълон қилинган кундан ўн кун ўтгач кучга киради. Бу дегани, яқин кунларда Қирғизистон хариталарида, ҳужжатларда ва давлат реестрларида Жалолобод номи ўрнига Манас номи ёзила бошлайди.
Ҳужжатда таъкидланишича, ном ўзгаришининг асосий мақсади — миллий мафкурани мустаҳкамлаш ва халқ қаҳрамони Манас номи орқали тарихий меросни абадийлаштириш ҳисобланади. Манас — қирғиз халқ достонларидаги афсонавий қаҳрамон бўлиб, у қирғизларни босқинчилардан ҳимоя қилган сиймолардан бири сифатида улуғланади.
Фактчекинг нуқтаи назаридан, Жалолобод шаҳри 1877 йилда асос солинган бўлиб, совет даврида ҳам, мустақилликдан кейин ҳам ўз тарихи ва маданий меросини сақлаб келган. Шаҳар Қирғизистонда аҳоли сони бўйича учинчи ўринда (184 минг киши) туради. Мамлакат ҳукумати ном ўзгариши шаҳарнинг маъмурий мақоми ёки аҳолига хизмат кўрсатиш тизимига таъсир қилмаслигини маълум қилган.
Шу билан бирга, қирғиз жамоатчилик ва экспертлари ўртасида ном ўзгариши бўйича турли фикрлар мавжуд: айримлар бундан фахрланса, бошқалар тарихий номнинг йўқолишига эътироз билдирмоқда.
