Қурилиш ва уй-жой коммунал хўжалиги вазирлиги коррупция ҳақида очиқ баёнот берган тадбиркор Усмонжон Абдусаматов устидан Ички ишлар вазирлигига расмий шикоят йўллади. Вазирлик тадбиркорнинг сўзларини “асоссиз маълумот” деб баҳолаб, улар соҳадаги ислоҳотлар ва ходимлар обрўсига путур етказганини таъкидламоқда.
Нима бўлган эди?
29 август куни қурилиш соҳаси вакиллари билан очиқ мулоқотда тадбиркор Тошкент шаҳрида уй қуриш учун рухсатнома ва кадастр ҳужжатларини олиш жараёнида коррупцион харажатлар бир объект учун 200 минг долларгача етиши мумкинлигини айтган. Унинг баёноти ижтимоий тармоқларда катта муҳокамаларга сабаб бўлди.
Вазирлик позицияси
Расмий баёнотда қайд этилишича, барча хизматлар электрон тартибда кўрсатилади ва қўшимча маблағ талаб қилиш тақиқланган. Шаҳарсозлик ҳужжатлари Ягона давлат хизматлари портали ёки Давлат хизматлари марказлари орқали берилади. Шунингдек, 2022 йилдан бери “Шаффоф қурилиш” ахборот тизими орқали рухсат беришдан тортиб, объектни топширишгача барча жараёнлар электрон назоратда экани эслатилди.
Тадбиркорнинг даъволари
Абдусаматовнинг сўзларига кўра, аризалар кўп ҳолларда асоссиз рад этилади ва “керакли манзилга бориб, пул кўрсатмагунингизча натижа чиқмайди”. У мисол сифатида:
Тошкент шаҳрида рухсат ва кадастр жараёнлари учун харажатлар 200 минг долларгача чиқиши,
Тошкент вилоятида эса 100 минг долларгача етиши мумкинлигини келтирган.
Фактчекинг нуқтаи назаридан
Вазирликнинг расмий ҳужжатлари ва Вазирлар Маҳкамасининг 2022 йил 20 апрелдаги 200-сон қарорида хизматлар электрон тизимда амалга оширилиши аниқ белгилаб қўйилган.
Бироқ тадбиркор келтирган “200 минг долларлик харажатлар” ҳақида ҳеч қандай расмий манба ёки суд ҳужжати мавжуд эмас. Бу фақат шахсий тажриба ва кузатиш сифатида айтилган баёнот.
Жамоатчиликда пайдо бўлган “ҳар бир уй учун 200 минг доллар пора талаб қилинади” каби умумий хулоса ҳозирча далиллар билан тасдиқланмаган.
