Таниқли россиялик блогер Илья Варламов Самарқанддаги “махлуқ-уй”ни бузмасдан, уни дидсизлик ва ўзбошимчалик даврининг ёдгорлиги сифатида сақлаб қолишни таклиф қилган.  

“Самарқандда ману шундай ғалати, йирик тошли гул ёки лола бошоғига ўхшаш бир уй бор. Айтишларича, уни бузишмоқчи эканлар. Фикримча, бу ажойиботни бузиш катта хато бўлади. Уни дидсизлик ва ўзбошимчалик даврининг ёдгорлиги сифатида сақлаб қолиш лозимдир. Бузиш керак бўлса, манзарани ёпиб турган унинг ёнидаги   оқ бинони йўқотиш керак”, - дея таъкидлаган у.

Қурилиш вазирлигининг баён этишича, маҳаллий фуқаро уйининг бир қисмини бузиб, қурилишга рухсат берувчи шаҳарсозлик ҳужжатларини расмийлаштирмасдан, икки қаватли ертўлага эга 11 қаватли меҳмонхона биносини қурган. Қурилиш пайтида у бир неча бор огоҳлантирилган, объект қурилишини тўхтатиш тўғрисида кўрсатмалар олган. Айни пайтда ҳокимлик бинони бузиш зарурлиги тўғрисида хулоса берган, аммо эгаси бу масала бўйича судга мурожаат қилиши мумкин.