2022 йил март ойида Тошкент шаҳрининг Яшнобод туманида содир этилган жиноят жамоатчилик орасида катта шов-шувга сабаб бўлганди. Instagram тармоғида Asalhoney тахаллуси билан машҳур бўлган блогер Асал Хўжаева шафқатсизона ўлдирилган. Орадан уч йил ўтиб, тергов органлари ушбу жиноятга оид барча тафсилотларни ошкор этди.

Ҳодисалар Асалнинг онаси у билан алоқа ўрната олмаганда бошланган. Улар ҳар куни телефон орқали гаплашишарди, шу боис, қизининг тинчлигига шубҳа туғилиши онанинг хавотирга тушишига сабаб бўлди. У Тошкентда яшовчи яқин дугонасига мурожаат қилиб, қизининг аҳволини текшириб келишини сўради.

Дугона Яшнобод туманидаги уйга борган, бироқ эшик қулфланганини кўрган. Ҳеч қандай жавоб бўлмаганидан сўнг, у қулфни очтиришга қарор қилган. Эшик очилганида остонада қон излари топилган ва хонанинг ётоқхонасида Асалнинг жасади аниқланган. Унинг танасида кўплаб санчиш ва кесиш жароҳатлари бўлган. Дарҳол ҳуқуқ-тартибот органлари чақирилган.

Қотил сифатида гумонланган шахс тезда аниқланган. У Асалнинг эски обуначиларидан бири бўлиб, унга нисбатан муҳаббат ва руҳий боғлиқлик ҳолатида бўлган. Гумонланувчи блогерга яқинлашиш мақсадида у билан ёзишмаларга киришган ва у бунга муайян пул миқдорида тўлов талаб қилгани маълум бўлган. Эркакда бу маблағ бўлмаган ва рад этилганидан сўнг, у ғазабини ичга ютиб, қотилликни режалаштирган.

У блогернинг ижтимоий тармоқлардаги фаолиятини диққат билан кузатиб борган, яшаш жойини, подъезд ва камераларни ўрганган. Қотиллик содир этилган куни у қўлида олдиндан сотиб олинган ов пичоғи билан қиз яшайдиган қаватга чиқиб, пойлоқчилик қилган. Асал эшикни очганида, у ҳужум қилган ва қорни ҳамда бўйнига бир неча марта пичоқ урган. Суд-тиббий экспертизаси бўйин соҳасидаги жароҳат ўлимга сабаб бўлганини аниқлаган.

Қотил ўша тунни квартирада ўтказган. Қизнинг телефони орқали 1 миллион сўмга яқин маблағни онлайн ўйинга ўтказиб юборган, 500 доллар ва смартфонини олган. Аммо заргарлик буюмларига тегмаган, чунки улар орқали фош бўлишдан қўрққан. Эрталаб соат 6:00 ларда у жиноят жойини тарк этган, пичоқни уй ортига, калит ва қўлқопларни эса ахлат қутисига ташлаб кетган.

Унинг ҳаракатлари видеокузатув камералари орқали қайд этилган ва у бир кун ичида қўлга олинган. Сўроқ пайтида у жиноятни тўлиқ тан олган ва ҳатто адвокати орқали "Имконият бўлса, яна шундай қилардим", деган баёнот берган.

Суд томонидан у Ўзбекистон Республикаси Жиноят кодексининг 97-моддаси (Қасддан одам ўлдириш) ва 164-моддаси (Босқинчилик) бўйича айбдор деб топилиб, 16 йил 6 ой муддатга озодликдан маҳрум этилди.