Россия президенти Владимир Путин Шимолий Корея етакчиси Ким Чен Инга Корея озод қилинганининг 77 йиллиги муносабати билан табрик телеграммаси йўллади. Орадан кўп вақт ўтмасдан Путин телеграммасига Ким Чен Индан жавоб келди. Бу ҳақда РИА Новости хабар берди.
Қайд этилишича, Шимолий Корея етакчиси ўз телеграммасида Пхеньян ва Москва ўртасидаги стратегик ҳамда тактик ҳамкорлик янги босқичга кўтарилаётганини таъкидлаган.
Шунингдек, "Кореяни озод қилиш учун курашда жасур Қизил Армия аскарлари ўз қонлари ва жонларини аямагани" ҳамда уларнинг хизматлари Корея халқи хотирасида доимий сақланиб қолишини билдирган.
КХДР раҳбари Шимолий Корея ва Россия ўртасидаги дўстлик ҳамда ҳамкорлик янада мустаҳкамланиб, икки мамлакат халқлари фаровонлигига ҳисса қўшишига ишонч билдирган.
