Транспорт вазирлиги томонидан тақдим этилган Тошкент метрополитенининг янги харитаси атрофидаги вазият қизиқ тус олмоқда. Бу бир йил аввал ижтимоий тармоқларда ташаббускор томонидан тақдим этилган вариантга жуда ўхшаш. Энг ажабланарлиси шундаки, ўтган вариант яхшироқ бўлиб чиққан.  

Россиялик дастурчи Евгений Амирасланов 2022 йил 6 май куни ўзининг “Модификатор” номли телеграм-каналида Тошкент метросининг янги схемасини таклиф қилганди. Дастурнинг сўзларига кўра, айни пайтда метронинг схемаси “ифодали” эмас.

Қизиғи шундаки, бугун Транспорт вазирлиги томонидан кўрсатилган схема Амирасланов томонидан таклиф этилганнинг бир хил нусхасидир.

Vse Budet agency реклама агентлиги дизайнери ва асосчиси Виталий Хальзуновнинг таъкидлашича, бу вазият “бир хил қилиш керак, лекин сал-пал фарқлансин”га ўхшайди.

“Табиийки,   метронинг расмий харитаси ёмонроқ чиққан. Ҳайронманми? Йўқ. Бошидан ташаббускорнинг каналидаги концептни сотиб олиш ва жойлаштириш керак эди. Чунки бу харита амалдагидан яхшироқ. Қачон велосипед ихтиро қилишни бас этамиз?”,– дея қўшимча қилди у.

Амираслановнинг ўзи эса плагиатга хотиржамлик билан муносабат қилган.

“Метронинг мен тайёрлаган схемаси халққа кетди. Янги бекатларнинг очиилишидан сўнг, Ўзбекистон Транспорт вазирлиги менинг схемам асосида ўзиникини чоп қилибди. Агарда у расмий бўлса, бу номаълум иммигрант   муаллифлик қилган биринчи метро схемаси сифатида ҳодисага айланади. Тўғриси, шаҳар маркази ва аэропорт белгиланмаса, унинг фойдаси бўлмайди. Чунки оддий айлана ва чизиқларни исталган жойда ёзиш мумкин. Мен эса шаҳарнинг ўзига хосликларини ифодаламоқчи бўлганман”, - деди у.

Ушбу вазият юзасидан Транспорт вазирлигининг расмий шарҳларини кутиб қоламиз. Шунингдек, бу схемани тайёрлашга қанча пул сарфлангани ошкор қилинса, яхши бўларди.