Ўзбекистонда болаларга нисбатан жинсий зўравонлик содир этган шахслар реестрини ташкил этиш режалаштирилган. Педофилларнинг ҳуқуқларини чеклайдиган бир қатор нормалар "Болаларни зўравонликнинг барча шаклларидан ҳимоя қилиш тўғрисида"ги қонун лойиҳасининг тегишли моддасида кўрсатилган.
Болаларга нисбатан жинсий зўравонлик содир этган шахслар реестрини яратиш Адлия вазирлиги томонидан ишлаб чиқилган "Болаларни зўравонликнинг барча шаклларидан ҳимоя қилиш тўғрисида"ги қонун лойиҳасида назарда тутилган бўлиб, у норматив-ҳуқуқий ҳужжатлар порталида жамоатчилик муҳокамасига қўйилган.
Ҳужжатга кўра, вояга етмаганларга нисбатан жинсий зўравонлик билан боғлиқ жиноят содир этган шахсларга таълим, тарбия, болалар саломатлиги, спорт ва ижодий ташкилотларда ишлаш ва болалар билан бевосита боғлиқ бошқа фаолият билан шуғулланиш тақиқланади. Ушбу меъёр судланганлик олиб ташлангани ёки амнистия қўлланилгани, шунингдек қўлланиладиган жазодан қатъий назар амал қилади.
Бундан ташқари, вояга етмаганларга нисбатан жинсий зўравонлик билан боғлиқ жиноятларни содир этган шахсларнинг алоҳида реестри юритилади. Ушбу шахслар ҳисобга олинган даврда улар ички ишлар органлари томонидан превентив тартибда кўриб чиқилади.
Реестрга киритилган шахслар яшаш жойи ва иш жойини ўзгартирганда тегишли ички ишлар органларини хабардор қилишлари шарт.
Реестрни яратиш ва юритиш, шунингдек ундан маълумот олиш тартиби ҳукумат томонидан тартибга солинади.
