Блогер Марьям Тилляеванинг тан олишича, мактабда уни жуда камситишган экан. Унинг бошини унитазга тиқишгани ва бошқа камситишларга дуч келгани ҳақида очиқчасига айтиб берган.
Мактабда ўқиб юрган даврларида Марьям Тилляевани ҳам буллинг четлаб ўтмаган экан. Фақат мактаб Швейцарияда жойлашган бўлиб, у ерга ёш Марьям онаси билан кўчиб ўтган эди.
“Мен қатнаган мактаб ўқувчилари жуда жаҳлдор эди. Сабаби – уларнинг ота-онаси жуда бадавлат кишилар бўлган, фарзандлари билан шуғулланишмаган ва шу боис, улар ўзича улғайишган. Мактабда бошимни унитазга тиқишган, ҳожатхонага қамаб қўйишган, ҳаттоки туғилган кунимда оқ курткамга шоколадли торт суртишган”, - деди у.
Шунингдек, Марьямнинг айтиб беришича, ўспиринлик даврида унинг ҳаёти осон кечмаган, унинг дугоналари кўп бўлмаган, қўлидаги туклар учун уни “макака” деб чақиришган, бобоси ҳақида ҳам салбий фикрлар билдирилиб, унинг ўзини “террорчи” дея ҳақорат қилишган.
Қиз онаси Лола Каримова-Тилляевага арз қилган, онаси мактабга бориб, муаммони ҳал қилишга уринган бўлсада, вазият янада ёмонлашаверган. Катталар Марьямга берган маслаҳатлари ўша давр воқелигига умуман тўғри келмаган.
"Ўша пайтларда жуда қийналганман, нима қилиш кераклиги ва кейинчалик қандай яшаш лозимлигини билмай қолганман”, - деди Марьям.
Марьямни бундай қийин ҳолатдан оилаларининг дўсти, таниқли инфлюенсер қутқариб қолган.
Ҳозирги болалар ва ўсмирлар бошидан кечираётгани каби, Марьям тенгдошлари билан кечган барча мураккабликларни енгиб ўтган, ўз қобиғига кириб қолмаган.
“Қачон бўлса ҳам бу ҳақда фильм суратга олмоқчиман”, - деди Марьям.
