Янги йилда Оксфорд университетида ўзбек тилини ўқитиш бошланади. Биринчи сессияга қатнашиш учун 15 киши истак билдирган.
"Дунё" маълумотларига кўра, Ўзбекистон элчиси Равшан Усмонов Оксфорд университети раҳбарияти ва олимлари билан музокаралар олиб борган. Хусусан, Оксфорд университети қошидаги Birso'z маркази директори Лейла Нажафзода билан учрашув доирасида томонлар ўқув юрти негизида ўзбек тилини ўқитиш лойиҳасини ишга туширишга келишиб олишган.
Марказни ўқув материаллари билан таъминлашни Ўзбекистон элчихонаси ўз зиммасига олган. Биринчи сессиялар 2024-йил январь ойида бўлиб ўтиши керак. Уларга 15 тингловчи ташриф буюриши кутилмоқда.
Британия олий ўқув юрти талабаларига ўзбек тилини ўргатишни бошлаш режалари ҳақида шу йилнинг ёзида эълон қилинган. Алишер Навоий номидаги Тошкент давлат ўзбек тили ва адабиёти университети ва Британия олий ўқув юрти ўртасида бу борада келишувга эришилган.
