Приморский ўлкасининг қурилиш компаниялари ўзбек фуқароларини ташкилий тарзда ишга жалб қилмоқчи. Бу масала мамлакатимиз дипломатларининг Россия минтақаси ҳукуматидаги мансабдор шахслар билан учрашувида муҳокама қилинган.
"Дунё" маълумотига кўра, ўтган куни Владивостокдаги Ўзбекистон Бош консуллиги вакиллари Приморский ўлкаси ҳукумати раисининг ўринбосари Виталий Блоцкий, қурилиш вазири вазифасини бажарувчи Алексей Першин ва Халқаро ҳамкорлик агентлиги раҳбари Алексей Старичков билан учрашишган.
Учрашув давомида ҳозирги кунда Россия минтақасида 7 минг нафар ишчи етишмаслиги қайд этилган. Дастлабки босқичда 1200 нафар турли мутахассисликдаги ишчиларни, шу жумладан ўзбекистонликларни жалб қилиш режалаштирилган.
Ўзбек дипломатлари хорижда ишлаётган юртдошларимизни ижтимоий, ҳуқуқий, моддий ва маданий қўллаб-қувватлаш масалаларини кўтарган. Россия томони Ўзбекистондан Приморский ўлкасига келган меҳнат мигрантларни қўллаб-қувватлашга тайёрлигини билдирган.
Учрашув иштирокчилари маҳаллий қурилиш компаниялари ва Ўзбекистон Ташқи меҳнат миграцияси агентлиги ўртасида ҳамкорликни йўлга қўйиш бўйича шартнома лойиҳасини муҳокама қилишган. Муҳокама натижасида Ташқи меҳнат миграцияси агентлиги ва Приморск ўлкаси Қурилиш вазирлиги ўртасида ҳамкорлик меморандумини имзолаш тўғрисида келишув имзоланган.
