Янги Ўзбекистон кўчаси чорраҳасида «гармошка» автобус ва Tracker тўқнашди. Автобус салонида йўловчилар бўлмаган, Tracker ҳайдовчиси тан жароҳати олиб, шифохонага олиб кетилган.
Пойтахтда King Long русумли автобус ва Tracker русумли енгил автомобил иштирокида йўл-транспорт ҳодисаси содир бўлди.
«Тошшаҳартрансхизмат» хабарига кўра, бугун, 29 феврал куни соат 06:45 ларда, «2-Автобус саройи» филиали тасарруфидаги King Long русумли 63-сонли йўналишда ҳаракатланаётган ҳайдовчи А.Ж. бошқарувидаги автобус АШБ томон ҳаракатланаётган вақтда ЙТҲ содир бўлган.
Маълум қилинишича, автобус Мирзо Улуғбек тумани, Янги Ўзбекистон кўчаси чорраҳасидан қайрилиб олиш вақтида қарама-қарши йўналишда ҳаракатланган Tracker русумли енгил автомобил юқори тезликда (197 км/соат) келиб, автобус билан (ўрта шина қисмига тегиб) тўқнашув содир этган.
Ушбу йўл-транспорт ҳодисаси вақтида автобус салонида йўловчилар бўлмаган. Tracker автомобили ҳайдовчиси тан жароҳати олган ва тез тиббий ёрдам кўрсатиш учун шифохонага олиб кетилган.
Ҳозирда ушбу йўл-транспорт ҳодисаси Тошкент шаҳар ИИББ ЙҲХБ ходимлари томонидан расмийлаштирилиб, тергов-суриштирув ишлари олиб бориляпти.
