Ўқиш даврида тўланган стипендия пенсия ҳисоблашда иш ҳақи турига кириши ҳақидаги саволларга жавоб берилди. Шунингдек, Пенсия жамғармасига тўланган суғурта бадалларининг миқдори пенсияларни ҳисоблаб чиқаришда эътиборга олинади.
Ўзбекистон қонунчилигида пенсияларни ҳисоблаб чиқаришда эътиборга олинадиган иш ҳақи турлари белгилаб қўйилган. Бу ҳақда ҳауқуқий ахборот каналида маълум қилинди.
Қайд этилишича, «Фуқароларнинг давлат пенсия таъминоти тўғрисида»ги қонунга кўра, ўқиш даврида тўланган стипендия ҳам мурожаат этувчининг хоҳиши билан иш ҳақига тенглаштирилиши мумкин.
Шу билан бирга, пенсияни ҳисоблаб чиқариш учун иш ҳақига:
- Суғурта бадаллари ҳисобланадиган меҳнатга ҳақ тўлаш тарзидаги барча даромадлар (2019 йил 1 январгача бўлган давр учун);
- Қонунчиликка мувофиқ, меҳнатга ҳақ тўлаш тарзидаги барча даромадлар (2019 йил 1 январдан кейинги давр учун);
- Давлат ижтимоий суғуртасига тааллуқли бўлмаган шахсларга пенсияни ҳисоблаб чиқариш учун олинадиган иш ҳақига меҳнатга ҳақ тўлаш тарзидаги даромадларга ўхшаш пул таъминотининг барча турлари қўшилади.
Яна қуйидагилар пенсияларни ҳисоблаб чиқаришда эътиборга олинадиган иш ҳақи турларига киради:
- Иш вақтини ҳисобга олиб бўлмайдиган ходимларнинг (якка тартибдаги тадбиркор ва у томонидан ёлланган ходимнинг, деҳқон хўжалиги ва оилавий тадбиркорлик субъекти аъзосининг) пенсиясини ҳисоблаб чиқариш учун олинадиган иш ҳақининг миқдори;
- Пенсия жамғармасига тўланган суғурта бадалларининг миқдори (2019 йил 1 январгача бўлган давр учун);
- Тўланган ягона ижтимоий тўлов миқдори (2019 йил 1 январдан 2019 йил 31 декабргача бўлган давр учун);
- Тўланган ижтимоий солиқ миқдори (2020 йил 1 январдан).
