Афсонавий ўзбек гимнастикачиси Оксана Чусовитина жароҳат туфайли Олимпия квотаси ўтказиладиган спорт гимнастикаси бўйича турнирда иштирок эта олмайди. Бу шуни англатадики, гимнастикачи 2024 йилда Парижда бўлиб ўтадиган тўрт йиллик ўйинларда қатнаша олмайди.

Спорт гимнастикаси бўйича аёллар ўртасида Осиё чемпионати 24 май куни Тошкентда бошланади. Ушбу турнир бўлажак Олимпия ўйинлари учун саралаш мусобақаси ҳисобланади. Мусобақа давомида якка тартибдаги кўп курашда битта Олимпия квотаси ўйналади. Уни олиш учун спортчи биринчи ўринни эгаллаши керак эди.

Оксана Чусовитина турнирда иштирок этиши ва олимпиадада мамлакатимизни яна бир бор намойиш этиш имконияти учун курашиши кутилган эди. Бироқ, мусобақа арафасида у машғулотларда жароҳат олган.

Бу ҳақда спортчининг ўзи Инстаграм саҳифасида маълум қилган. У томошабинларни бошқа ўзбек гимнастикачиларини қўллаб-қувватлашга чақирган.

"Афсусдаман, чунки мен жуда узоқ вақт тайёргарлик кўрдим. Мен кўпкурашга қайтдим ва мамлакатимизда, мухлисларимиз олдида чиқиш қилишни хоҳладим. Аммо, афсуски, эртага мени иштирокчилар орасида кўрмайсиз. Мен ҳаммага катта раҳмат айтмоқчиман ва эртага келиб қизларимизни қўллаб – қувватлашга таклиф қиламан, мен ҳам мухлислар орасида бўламан", - деди спортчи.

Оксана Чусовитина спорт гимнастикаси бўйича Олимпия чемпиони, Осиё ўйинлари ва “Жаҳон юлдузлари” халқаро мусобақалар совриндори. Чусовитина Олимпиададаги энг кўп чиқишлари учун Гиннеснинг рекордлар китобига киритилган. У гимнастика тарихидаги саккизта ёзги Олимпиада ўйинларида кетма-кет қатнашган ягона спортчи(1992, 1996, 2000, 2004, 2008, 2012, 2016, 2020) саналади.