Ўзбекистон миллий Қонунчилик базаси фойдаланувчилари энди ҳар қандай ҳужжатни тинглашлари мумкин.

Функция ўзбек тили моделига асосланган сунъий интеллект ёрдамида яратилган. У "Адолат" Миллий ҳуқуқий ахборот маркази томонидан рақамли технологиялар ва сунъий интеллектни ривожлантириш илмий-тадқиқот институти билан ҳамкорликда ишга туширилган.

Овозни тинглаш функциясидан фойдаланиш учун ҳужжат матнининг ўнг томонида пайдо бўлган учта нуқта белгисини босиш ва очиладиган “Аудиони тинглаш” ҳаволасини танлаш керак.

Ушбу функция яқинда ишга туширилганлиги сабабли, ҳужжатнинг аудио форматини тинглашда хатолар кузатилиши мумкин.

Бундай ҳолда, фойдаланувчилар сайт модераторларига хатолар ва камчиликлар тўғрисида ҳужжат матнининг ўнг томонидаги учта нуқта белгисини босиш орқали хабар беришлари мумкин, сўнгра "Ҳужжат бўйича таклифлар" ҳаволасида "Техник хато" гап турини танлаш керак бўлади.

Шунингдек, сунъий интеллект туфайли фойдаланувчилар онлайн ҳужжатларни инглиз, рус ва бошқа хорижий тилларга таржима қилишлари мумкин.

Бундан ташқари, Lex.uzда тез орада овозли қидирув ёрдамида ҳужжатларни топиш ва тинглаш имконияти пайдо бўлиши ҳақида хабар берилган.