Бирлашган Миллатлар ташкилоти якшанба куни кенг кўламли халқаро декларацияни – очлик, тенгсизлик ва можароларга қарши курашишга чақирувчи келажак пактини қабул қилган.  

42 саҳифали ҳужжат Глобал рақамли шартнома ва келажак авлодлар Декларациясини ўз ичига олади. У Нью-Йоркда "Эртанги кун учун кўп томонлама қарорлар" мавзусидаги саммитдан сўнг қабул қилинган ва БМТга аъзо 193 мамлакат раҳбарларини ваъдаларни сайёрани ўзгартирадиган ҳақиқий ҳаракатларга айлантиришга чақиради.

Унинг мақсади - халқаро тинчлик ва хавфсизликни таъминлаш, инклюзив жамиятни ривожлантириш ва технология инсониятнинг умумий манфаатига хизмат қилишини кафолатлашдир.

Бирлашган Миллатлар ташкилоти таъкидлаганидек, "Пакт йиллар давомида энг кенг кўламли халқаро келишув бўлиб, янги соҳаларни ҳам, ўнлаб йиллар давомида келишувга эриша олинмаган масалаларни ҳам қамраб олади".

Ташкилотнинг таъкидлашича, ҳужжат биринчи навбатда халқаро институтларнинг яратилганидан бери тубдан ўзгарган дунё шароитида фаолият юритиш қобилиятини таъминлашга қаратилган.

Ҳужжатни бажариш учун аъзо давлатлар қуйидагиларни ўз зиммасига олган:

• барқарор ривожланиш Мақсадлари (БРМ) ва иқлим ўзгариши бўйича Париж келишувига эришишни тезлаштиришдир, булар 2015 йилда тараққиётнинг пасайиши ва муҳим босқичларнинг ўтказиб юборилиши кузатилган иккита муҳим келишув саналади;

• ёшларни тинглаш ва уларни миллий ва глобал миқёсда қарор қабул қилиш жараёнига киритиш;

• фуқаролик жамияти, хусусий сектор, маҳаллий ва минтақавий ҳокимият органлари ва бошқалар билан янада мустаҳкам ҳамкорлик алоқаларини ўрнатиш;

• тинч, инклюзив ва адолатли жамиятларни яратиш ва қўллаб-қувватлаш ва низоларнинг асосий сабабларини бартараф этиш бўйича саъй-ҳаракатларни икки баравар ошириш; 

• қуролли тўқнашувларда барча тинч аҳолини ҳимоя қилиш;

• аёллар, тинчлик ва хавфсизлик бўйича мажбуриятларнинг бажарилишини тезлаштириш.

Россия, КХДР, Никарагуа, Сурия, Судан, Эрон ва Беларус ҳужжатни қабул қилишга қарши чиқишган.