Самарқанд вилоятида маҳаллий прокурор ва вояга етмаган қизни зўрлашда гумон қилинаётган яна етти киши ҳибсга олинган. Ҳаммаси бўлиб, иш бўйича тўққиз нафар шахс жавобгарликка   тортилмоқда.

Бош прокуратура матбуот хизматининг маълум қилишича, 2024 йил 6 октябрда жабрланган қиз шу йилнинг 2 октябрь куни бир неча киши томонидан зўрланганини билдириб, шикоят қилган. Тергов ҳаракатлари давомида 30 октябрда ишдан бўшатилган Қўшрабод туман прокуратураси ходими ҳам ишга даҳлдор экани маълум бўлган. 31 октябрь куни Иштихон тумани прокуратураси “жинсий эҳтиёжни куч ишлатиш йўли билан ғайритабиий тарзда қондириш” моддаси бўйича жиноят иш қўзғатган.

Ўтказилган тадбирлар натижасида тўққизта гумондор аниқланган, улардан саккизтаси, шу жумладан собиқ прокурор ҳибсга олинган. Ҳозирда қолган гумонланувчини ҳибсга олиш бўйича ҳаракатлар давом этмоқда. Бош прокуратура терговни назорат қилиб, адолатни таъминлаш ва вояга етмаганларнинг ҳуқуқларини ҳимоя қилиш муҳимлигини таъкидлаган.

Эслатиб ўтамиз, Самарқанд вилоятида саккизинчи синф ўқувчиси бир гуруҳ шахслар томонидан ўғирлаб кетилган ва зўрланган. Қиз 23 сентябрда йўқолган, фақат 6 октябрда у зўравонлик белгилари билан топилган. Жабрланувчининг сўзларига кўра, у бир неча кун калтакланган, спиртли ичимликлар ва тақиқланган моддаларни қабул қилишга мажбур бўлган, иродасига қарши ушлаб турилган ва зўрланган.