2024 йил 20 декабрда Президент томонидан қабул қилинган ПФ-223-сонли Фармон ҳудудларда иқтисодий ўсишни жадаллаштириш ва аҳоли бандлигини ошириш мақсадида муҳим ислоҳотларни амалга ошириш учун ҳуқуқий асос яратди. Мазкур ҳужжат маҳаллий ҳокимиятларнинг иқтисодий ривожланиш жараёнидаги роли ва масъулиятини янада ошириш, уларнинг ташаббускорлик салоҳиятини кучайтиришга қаратилган.
Фармоннинг асосий мақсадлари ва вазифалари:
Маҳаллий ҳокимиятларнинг ролини ошириш:
- Ҳудудий иқтисодий ривожланиш бўйича ташаббусларни қўллаб-қувватлаш.
- Маҳаллий ҳокимликларни ислоҳот ва ўзгаришларга "эгалик қилиш" масъулияти билан таъминлаш.
Мақсадли кўрсаткичлар жорий этиш:
- 2025 йилда республика ва ҳудудлар миқёсида иқтисодий ўсиш, ишсизлик ва камбағаллик даражасини пасайтириш бўйича аниқ кўрсаткичлар белгилаш.
- Мазкур кўрсаткичларга эришиш учун маҳаллий ҳокимликларга кенг имкониятлар ва воситалар тақдим этилади.
Аҳолини иш билан таъминлаш:
- Маҳаллий даражада янги иш ўринлари яратиш ва ишсизликни камайтиришга қаратилган чора-тадбирларни амалга ошириш.
Молиявий имкониятлар ва ваколатлар:
Фармонга мувофиқ, маҳаллий ҳокимият органларига бир қатор янги молиявий ваколатлар берилади:
Солиқ тушумлари тақсимоти:
2025 йил 1 январдан бошлаб:- Айланмадан олинадиган солиқ, юридик шахсларнинг мол-мулкига солинадиган солиқ, юридик шахслардан олинадиган ер солиғи, давлат активларини ижарага беришдан тушумлар тўлиқ ҳажмда туман (шаҳар)лар бюджетларига йўналтирилади.
- Жисмоний шахслардан олинадиган даромад солиғи тушумларининг камида 50 фоизи туман (шаҳар)лар бюджетларида қолади.
Давлат активлари сотувидан тушган маблағларни тақсимлаш:
- Давлатга тегишли акциялар (улушлар)ни сотишдан тушган маблағларнинг 90 фоизи Қорақалпоғистон Республикасининг республика бюджетига, вилоятлар бюджетига, Тошкент шаҳар бюджетига ва объект жойлашган туман (шаҳар) бюджетига тенг улушларда тақсимланади.
Фармоннинг аҳамияти:
Мазкур фармон ҳудудларда иқтисодий ривожланишга рағбат бериш ва маҳаллий ҳокимиятларнинг иқтисодий фаолиятини кучайтиришга қаратилган. Бу орқали ҳудудларнинг иқтисодий мустақиллиги ошади, маҳаллий даражадаги ресурслардан самарали фойдаланишга замин яратилади. Шунингдек, аҳолининг турмуш даражасини яхшилаш ва бандликни ошириш учун янада қулай шароитлар яратилади.
Ушбу ислоҳотлар натижасида иқтисодиётни диверсификация қилиш, ҳудудий тенгликни таъминлаш ҳамда халқ фаровонлигини оширишга эришиш кутилмоқда.
