Жорий йилнинг 1 февралидан бошлаб, Саудия Арабистонида умра ва ҳаж амалларини адо этмоқчи бўлган барча зиёратчиларни менингитга қарши эмлаш мажбурий бўлади. Виза туридан қатъи назар, мамлакатга келадиган ҳар бир сайёҳ учун эмлаш талаб этилади.

Саудия Арабистони Соғлиқни сақлаш вазирлиги маълумот беришича, эмлаш учун тўрт компонентли Neisseria вакцинаси, полисахарид ёки конюгирланган вакцинадан бири танланиши керак. Эмлаш сертификати камида 10 кун олдин олинган бўлиши шарт, полисахарид вакцина учун 3 йилдан кўп бўлмаган, конюгирланган вакцина учун эса 5 йилдан кўп бўлмаган муддатда берилган эмлаш сертификати қабул қилинади.

Бир ёшгача бўлган болалар учун эмлаш талаб этилмайди. Саудия Арабистони соғлиқни сақлаш вазирлиги саёҳатдан камида 10 кун олдин эмланишни тавсия этмоқда.