Ўзбекистонлик ҳужумчи Ҳусайн Норчаев Португалиянинг «Брага» клубига ўтиши кутилган эди, бироқ виза масаласидаги муаммолар сабабли трансфер амалга ошмади.
«Брага» футболчини тиббий кўрикдан ўтказиш учун таклиф юборган. Шу сабабли Норчаев миллий терма жамоа йиғинини ярим йўлда тарк этиб, Тошкентга қайтган. Аммо Ўзбекистонда Португалия элчихонаси мавжуд эмаслиги сабабли футболчининг агентлари Франция элчихонаси орқали виза масаласини ҳал қилишга уринган.
Ўзбекистон Ташқи ишлар вазирлиги ҳам бу жараёнда ёрдам берди. Бироқ Португалия элчихонаси ходимлари қисқа муддатда виза расмийлаштириб бўлмаслигини билдирган ва футболчидан душанба куни Москвага келишни сўраган. Шу пайтга келиб эса трансфер ойнаси ёпилаётгани сабабли Норчаев Португалияга учиб кета олмаган.
«Football Group» агентлиги, Ҳусайн Норчаев ва унинг вакиллари кўрсатилган ёрдам учун Франция элчихонаси, Ўзбекистон футбол ассоциацияси ва Ташқи ишлар вазирлигига миннатдорчилик билдирган.
