Англиянинг машҳур клуби «Тоттенҳэм Ҳотспур» расмий тарзда ўз номи тўғри қўлланилиши юзасидан телеканалларга мурожаат қилди.
Сўнгги учрашувларда жамоа номи ТВ-графикаларда турлича акс этгани The Athletic нашри эътиборини тортди. Масалан, «Манчестер Юнайтед»га қарши баҳсда бош мураббий Анже Постекоглу «Тоттенҳэм Ҳотспур» мураббийи сифатида титрларда кўрсатилди, лекин жамоа таркиби «Шпорлар» (Spurs) номи остида берилди. Шунга ўхшаш ҳолат 19 январда «Эвертон»га қарши ўйинда ҳам кузатилган: унда клуб номи «Тоттенҳэм» сифатида кўрсатилган эди.
Клуб 10 февралда барча телеканалларга юборган электрон хат орқали бу масалага ойдинлик киритди. Расмий баёнотда клуб номи тўғри қўлланиши ва «Тоттенҳэм» атамасидан фойдаланмаслик тавсия қилинган. Тўғри ишлатилиши эса «Тоттенҳэм Ҳотспур» ёки «Шпорлар» сифатида белгиланган.
Бу қарор клуб позициясига асосланган бўлиб, «Тоттенҳэм» сўзи жамоанинг эмас, балки Лондоннинг шу номдаги туманини англатишини таъкидлайди. Клуб 2011 йилдан бери айнан шу номлаш услубига амал қилиб келади.
Бундан ташқари, «Шпорлар» ўтган ноябрда янги брендбукни тақдим этиб, клуб номи фақат «Тоттенҳэм Ҳотспур», «Тоттенҳэм Ҳотспур футбол клуби» ёки «THFC» сифатида қўлланилишини таъкидлаган. Унда «Жамоамизни ҳеч қачон «Тоттенҳэм» деб айтманг» деган талаб ҳам келтирилган.
АПЛ расмий сайти ва телеканаллар бу илтимосни инобатга олди, аммо мухлислар ушбу ўзгаришга қанчалик мослашади – бу вақт кўрсатади.
