2025 йилдан бошлаб Ўзбекистонда таълим ўзбек тилида олиб борилмайдиган умумтаълим муассасаларининг 9- ва 11-синф битирувчилари учун давлат тили – ўзбек тили бўйича якуний имтиҳон топшириш мажбурий бўлади. Бу ҳақда Мактабгача ва мактаб таълими вазири Ҳилола Умарованинг 2025 йил 20 февралдаги 65-сонли буйруғига асосланиб хабар берилмоқда.
Ҳужжатга кўра, 9-синф битирувчилари қуйидаги фанлардан якуний давлат аттестациясидан ўтадилар:
- Она тили ва адабиёт (ўзбек тилида таълим олувчилар учун) – ёзма
- Давлат тили (бошқа тилда таълим олувчилар учун) – ёзма
- Математика – ёзма
- Ўзбекистон тарихи – ёзма/оғзаки
- Жисмоний тарбия – амалий шаклда
Шунингдек, 11-синф битирувчилари учун якуний аттестация қуйидаги фанларни ўз ичига олади:
- Она тили ва адабиёт (ўзбек тилида таълим олувчилар учун) – ёзма
- Давлат тили (бошқа тилда таълим олувчилар учун) – ёзма
- Математика (базавий ёки чуқурлаштирилган) – ёзма
- Тарих – ёзма
Бундан ташқари, ўқувчилар ўз танлови бўйича қўшимча фанлардан ҳам аттестациядан ўтишлари мумкин.
Таъкидланишича, ушбу ўзгаришлар таълим сифатини ошириш ва давлат тилининг ўрганилишини такомиллаштириш мақсадида жорий этилмоқда. Якуний аттестация ва таълим тизимидаги ўзгаришлар ҳақида қўшимча маълумотлар расмий манбалар орқали эълон қилинади.
