Тошкент шаҳар Янгиҳаёт туманида ички ишлар бўлимида хизмат қилган уч нафар ҳуқуқ-тартибот ходими жазога тортилди. Улар қўлга олинган шахсларга нисбатан қийноқ қўллаш, ишни сохталаштириш ва гиёҳванд моддалар билан боғлиқ жиноий схемада иштирок этишда айбдор деб топилди. Суд ҳар бир айбдорга 5 йилдан 12 йилгача озодликдан маҳрум қилиш жазосини тайинлади.

Қийноқ: камерасиз хоналар, пакетлар ва электрошокер

Суд жараёнида маълум бўлишича, Янгиҳаёт тумани ИИБ катта тезкор вакили ва икки нафар инспектори гумонланувчиларни махсус танланган, видеокузатувсиз хоналарга олиб кириб, уларга нисбатан шафқатсиз ҳаракатлар содир этган.

Жабрланувчилардан бирининг сўзларига кўра, қўллари кишанланган ҳолда бошига полиэтилен пакет кийгизилган ва скотч билан боғланган, бу эса нафас олишни қийинлаштирган. Яна бир жабрланувчи резина калтаклар билан калтакланиши оқибатида қулоғи шикастланган. Терговда аниқланишича, уларнинг барчаси таҳдид, зўравонлик ва психологик босим остида тушунтириш хатлари ёзишга мажбурланган.

Аёл жабрланувчилардан бири эса жинсий зўравонлик таҳдидлари ва жисмоний калтаклашга учрагани ҳақида гувоҳлик берди.

Суд мазкур ҳаракатларни “тизимли ва ўта шафқатсиз шаклда амалга оширилган” деб баҳолади.

Сохта “операция”: гиёҳванд моддалар фитнаси

Айни иш доирасида ички ишлар ходимларидан бири гиёҳванд моддалар савдосида иштирок этгани ҳам аниқланди. Маълум бўлишича, жазони ўтаётган маҳкум инспектор орқали тақиқланган моддаларни ташишни ташкил этишга уриниб, у билан тил бириктирган. Инспектор эса хавфсиз етказиб беришни таъминлашга ваъда берган.

Бироқ кейинчалик, моддалар миқдори катта эканини билиб қолган ходим тасодифий транспорт воситасини тўхтатиб, гиёҳванд моддаларни у ерга қўйган ва масъулиятни бошқаларга юкламоқчи бўлган. Аммо тергов унинг ҳаракатларини фош этди. Ушбу эпизоддаги бош уюштурувчи — жазони ўтаётган маҳкум — 12 йилга озодликдан маҳрум этилди.