Ўзбекистон аёллар миллий терма жамоаси 23 йиллик танаффусдан сўнг Осиё кубоги финал босқичига йўлланма олди. Жамоа 5 июль куни Непалга қарши ўйинда асосий вақтни 3:3 ҳисобида якунлаб, пеналтида 4:2 ҳисобида ғалаба қозонди.
Беллашув Тошкентдаги «Бунёдкор» стадионида бўлиб ўтди. Терма жамоамиз муҳим ўйинда ирода ва жасорат намоён этиб, мухлисларни хурсанд этди.
Учрашувда кучлар тенг келиб, ҳар икки жамоа 3 тадан гол урди. Пеналти сериясида эса ўзбекистонлик аёллар матонат кўрсатиб, ҳал қилувчи ўйинда зафар қучишди.
Спорт вазирлиги ушбу ғалабани расман эълон қилди ва 23 йиллик танаффусдан сўнг қўлга киритилган йўлланмани тарихий воқелик сифатида қайд этди.
