Ўзбекистонлик ҳимоячи Абдуқодир Ҳусанов Англия Премьер-Лигасидаги энг тез югурган футболчилар рўйхатида 7-ўринни эгаллади. У “Ноттингҳем Форест”га қарши ўйинда соатига 36,29 км тезликка эришган.

АПЛ расмий саҳифаси эълон қилган ушбу рўйхатда “Тоттенҳем” ҳимоячиси Микки ван де Вен 37,12 км/с кўрсаткичи билан 1-ўринга чиқди. 2 ва 3-поғоналарни эса 36,65 км/с тезлик қайд этган “Ноттингҳем Форест”дан Антони Эланга ва “Брентфорд”дан Браян Мбеумо эгаллашди.

Абдуқодир Ҳусанов бундан аввал ҳам Франциядаги Лига 1 учрашувларидан бирида 37 км/с тезликка эришган эди. Бу кўрсаткич Ямайкалик Усейн Болтнинг 2009 йилги жаҳон рекорди — 37.58 км/сга жуда яқин. Бироқ таъкидлаш керакки, Болт 60-80 метр оралиғида 44.72 км/с максимал тезликка эришган — бу инсон тарихидаги энг юқори югуриш тезлигидир.

Эслатиб ўтамиз, Ҳусанов фаолиятини “Манчестер Юнайтед”да давом эттириши мумкинлиги ҳақида ҳам аввал хабарлар тарқалган. “Қизил иблислар” скаутлари унинг ўйини ва трансфер вазиятини диққат билан кузатмоқда.

Маълумот учун: Абдуқодир Ҳусанов 2025 йил январь ойида “Манчестер Сити”га қўшилган ва жамоа сафида ҳозирча фақат бир ўйинда майдонга тушган. Шу билан бирга, у клублар ўртасидаги жаҳон чемпионатида қатнашган илк ўзбекистонлик футболчи ҳисобланади.