Россияда менингококк инфекцияси бўйича ташвишли тенденция кузатилмоқда. 2025 йилнинг бошидан бери 1266 та менингит ҳолати қайд этилди — бу 2024 йилнинг бутун кўрсаткичидан икки баравар кўп. Бу ҳақда “Известия” нашри хабар берди.
Энг кўп касалланиш ҳолатлари апрел ойига тўғри келган. Мутахассислар инфекциянинг А, B ва C шакллари бўйича кескин ўсишни қайд этмоқда. Ҳар бир ҳудудда менингококк инфекциясининг турли серотиплари аниқланмоқда, бу эса эпидемияни назорат қилишни қийинлаштиради.
Статистикага кўра, ҳолатларнинг ярмидан кўпи Москвага тўғри келмоқда — пойтахт эпидемиянинг эпицентрига айланиб бормоқда. Хусусан, вояга етганлар орасида гуруҳли ҳолатлар сони ошиб бормоқда, уларнинг қарийб 60 фоизини меҳнат муҳожирлари ташкил этади.
Бу ҳолат мутахассисларни жиддий чоралар кўришга ундамоқда. Улар меҳнат муҳожирларини оммавий эмлашни кучайтириш, шунингдек, болалар, мактабгача таълим муассасалари тарбияланувчилари ва биринчи курс талабалари учун профилактик эмлаш дастурларини жорий этишни таклиф қилмоқда.
Роспотребнадзорнинг маълумотларига кўра, 2024 йилда менингококк инфекцияси билан касалланганлар орасида ўлим даражаси 15 фоизни ташкил этган. Шу билан бирга, эмланганлар сони кескин камайган — бу ҳолат умумий иммунитетнинг пасайишига олиб келмоқда.
Агар бу тенденция тўхтамаса, менингит инфекцияси мамлакат соғлиқни сақлаш тизими учун жиддий синовга айланиши мумкин.
