Henley Passport Index’нинг 2025 йилги янгиланган рейтинг натижаларига кўра, Ўзбекистон паспорти 74-поғонадан жой олди. Мамлакат фуқаролари учун визасиз саёҳат мумкин бўлган давлатлар сони 62 тани ташкил этмоқда. Бу натижа, 2024 йилда қайд этилган 80-ўринга нисбатан, анча яхши.
Ҳужжатга кўра, дунёнинг энг “қудратли” паспортлари Шарқий ва Жануби-Шарқий Осиё мамлакатларига тегишли. Рейтингда биринчи ўрин Сингапурга насиб этган — унинг фуқаролари 193 давлатга визасиз кириши мумкин. Кейинги ўринларда Япония ва Жанубий Корея қайд этилган. Энг охирги ўринлар эса Афғонистон, Сурия ва Ироққа тўғри келмоқда.
Марказий Осиё давлатлари паспортлари рейтингда қуйидаги тартибда жой олди:
Қозоғистон — 63-ўрин (79 давлат);
Қирғизистон — 73-ўрин (63 давлат);
Ўзбекистон — 74-ўрин (62 давлат);
Тожикистон — 80-ўрин (56 давлат);
Туркманистон — 85-ўрин (49 давлат).
Henley Passport Index — халқаро паспорт рейтингидир. У фуқаролар қайси давлатларга визасиз ёки енгиллаштирилган тартибда саёҳат қилиши мумкинлигини кўрсатади. Индекс инсоннинг глобал ҳаракатчанлик даражасини аниқлашда кенг қўлланилади.
Ўзбекистоннинг сўнгги йилларда ушбу индексда юқорига кўтарилиши давлатнинг ташқи сиёсатдаги фаоллиги ва халқаро ҳамкорлик даражасининг ортиши билан изоҳланиши мумкин. Бироқ, ҳали ҳам ривожланган давлатлар даражасига етиш учун визасиз йўналишлар сони сезиларли даражада ошиши лозим.
