Ўзбекистон фуқаролари, хусусан меҳнат муҳожирлари ва уларнинг оилалари учун «А.У.Е.» ҳаракати реал таҳдид солмоқда. Бу жиноий тузилмага алоқадорлик Россия қонунчилигига кўра жиноий жавобгарлик, катта жарималар, озодликдан маҳрум этиш ва депортацияга олиб келиши мумкин.

Жазо чоралари:
300 000 — 600 000 рублгача жарима
1 йилгача озодликдан маҳрум этиш
1–4 йиллик мажбурий меҳнат
2–6 йиллик қамоқ жазоси

Бундан ташқари, ишсизлик, ҳуқуқий мақомни йўқотиш, Россиядан чиқариб юбориш ва бутун оиланинг келажагига хавф туғилади.

«А.У.Е.» нима ва у қаердан келган?

Бу сўзнинг кенг тарқалган шакли — «Арестантский уклад един», яъни “маҳбуслар қонуни ягона” деган маънони англатади. У Россияда 2020 йилда экстремистик ҳаракат сифатида расман тақиқланган. Ҳаракат “ўғрилар қонунлари”ни идеаллаштириб, қамоқхоналар маданиятини оддий ҳаётга сингдиришни мақсад қилади.

Қандай тарқалмоқда?

Ижтимоий тармоқлар, чатлар ва видеоплатформалар орқали ёшлар ва муҳожирлар орасида тарқалмоқда
“Братва”, “общак”, “закон по понятиям”, “смотрящий” каби иборалар орқали тарғибот олиб борилади
Ишдан кейин “дўстона гуруҳ” сифатида бошланиб, аста-секин жиноий тузилмага айланади

Нега ота-оналар ва муҳожирлар огоҳ бўлиши керак?

Сўнгги йилларда Россияда «А.У.Е.»га алоқадорликда айбланган Ўзбекистон фуқаролари қамалган. Бу нафақат шахсий эркинлик, балки бошқа юртдошларимиз имижига ҳам салбий таъсир кўрсатмоқда.

Огоҳликка чорлов:

Фарзандларингиз кимлар билан алоқада?
“Закон по понятиям” ва “общак” каби сўзларни эшитдингизми?
Россияда меҳнат қилаётган танишларингиз кимлар билан ишламоқда?

Ҳар бир кечиктирилган сўз — эртага фожиага айланиши мумкин.

Хулоса:

«А.У.Е.» — ҳурмат қозониш йўли эмас, балки эркинликни йўқотиш, ўзингиз ва яқинларингизни ҳалокатга тортиш йўлидир. Жиноят эмас, ҳалол меҳнатни танланг. Огоҳ бўлинг, атрофдагиларни ҳам огоҳлантиринг.