Мажбурий ижро бюроси расмий сайтида қарздорларнинг онлайн реестри фойдаланишга топширилди. Янги сервис орқали жисмоний ёки юридик шахснинг ижро иши бўйича қарздорлар рўйхатида бор-йўқлигини онлайн текшириш мумкин.

Маълумот олиш учун жисмоний шахслар ЖШШИР, юридик шахслар эса СТИР рақамини киритишлари кифоя. Реестр молиявий мажбуриятларни бажармаган ва тўловга қобилиятсиз ёки инсофсиз тўловчи сифатида рўйхатга киритилган шахслар ҳақида маълумот беради.

Тизим турли ҳолатларда — квартира ижараси, товарларни бўлиб тўлаш орқали сотиш, қарз бериш ёки битим тузишда хавфни баҳолаш учун қўл келиши мумкин. Агар шахс ёки компания рўйхатда бўлса, қарз тўлиқ қоплангандан сўнг ва Бюронинг ҳудудий бўлимига мурожаат этилганидан кейингина чиқарилиши мумкин.

Хатоликлар ёки саволлар бўйича 1107 ёки +998 71 231-11-07 ишонч телефони орқали мурожаат қилиш мумкин.

Аввалроқ маълум қилинганидек, қарздор вафот этган, ижро ҳужжати бекор қилинган ёки ҳақиқий эмас деб топилган, 10 йил мобайнида мол-мулки ёки маблағлари аниқланмаган, шунингдек, расман банкрот деб топилган ҳолларда ундирувчининг аризасига кўра реестрдан чиқарилади.