Тошкент вилоятида тўйдан уч кун ўтиб вафот этган ёш келиннинг ўлими юзасидан зиддиятли маълумотлар тарқалди. Марҳуманинг онаси қизининг ўз жонига қасд қилмаганини, балки эрининг қариндошлари томонидан бўғиб ўлдирилганини иддао қилмоқда. Қайнона эса бу фожиани суицид деб атади.
Оналик дарди билан Millar телекўрсатувига чиққан аёлнинг сўзларига кўра, у 3 апрель куни қизни Келес шаҳрига турмушга берган. Совчилик пайтида куёвнинг қариндошлари қизга жуда эҳтиёжлари борлигини айтиб, ялиниб розилик сўрашган. Оила фаровон ва яхши одамлар сифатида кўрсатилгани учун аёл розилик берган.
Бироқ 6 апрель куни соат 18:00 атрофида қизнинг вафот этгани ҳақида хабар келган.
“Қизим бахтли эди, видеолар олиб жўнатарди, хурсанд эди. У ўз жонига қасд қилолмасди. Ишончим комилки, қизимни бўғиб ўлдиришган. Ҳақиқатни исботлаш учун қабрини очишга ҳам тайёрман”, — деди она.
Қайнона эса мутлақо бошқача фикрда:
“Бу ўз жонига қасд қилиш бўлган. Агар бошқача бўлса, биз ҳалигача озодликда юрмас эдик. Уйда ҳеч ким йўқ эди. Уч кунлик келинни ҳеч ким ўлдирмайди”, — деган у.
Маҳалладаги қўшнилар ҳам марҳуманинг оиласи фаровонлиги ҳақида гапирган. Она икки фарзандни етиштирган, эри йўқ бўлганига қарамай, қизини чиройли тўй қилиб узатганини таъкидлашди.
Тошкент вилояти прокуратураси ушбу иш бўйича онанинг шикоятини кўриб чиққан. Терговга қадар текширув натижасига кўра, бошқа шахслар ҳаракатида жиноят аломатлари топилмаган ва жиноят иши қўзғатиш рад этилган.
