АҚШ Президенти Дональд Трамп 1 сентябрь куни ўз ўлими ва соғлиғи билан боғлиқ тарқалган миш-мишларга нуқта қўйди. У Truth Social ижтимоий тармоғида: “Ҳаётимда ҳеч қачон ўзимни бундан яхши ҳис қилмаганман”, деб ёзди.

Сўнгги кунларда интернетда “Trump is dead” (Трамп ўлди) хештеги остида минглаб постлар тарқалган, бу эса ижтимоий тармоқларда катта баҳсларга сабаб бўлди.

Миш-мишларнинг пайдо бўлишига вице-президент Жеймс Дэвид Вэнснинг баёноти туртки бўлган. У Трампга бирор нарса бўлиб қолса, президентликни ўз зиммасига олишга тайёрлигини билдирган, бироқ шу билан бирга, раҳбарнинг соғлиғи яхши эканини ва бутун президентлик муддати давомида ишлай олишига ишонч билдирган эди.

30 август куни X (Twitter) платформасида тарқалган хабарларга жавоб сифатида, Америка расмийларидан бири “Axios” журналисти Барак Равидга Трампнинг “эрталаб гольф ўйнаётгани”ни айтган. Бу ҳам президентнинг соғлиги яхши эканини тасдиқлаган.

Трампнинг баёнотидан сўнг, унинг соғлиғи ҳақидаги саволлар вақтинча ёпилгандек кўринади. Аммо ижтимоий тармоқларда сиёсий рақобат ва пропаганда фонида шунга ўхшаш миш-мишлар яна қайтиши мумкин.