АҚШ президенти Дональд Трамп 3 сентябр куни Хитой пойтахти Пекинда ўтаётган ҳарбий парадга муносабат билдирар экан, Хитой, Россия ва Шимолий Корея раҳбарларини Вашингтонга қарши фитна тайёрлашда айблади.

Трамп Truth Social платформасидаги саҳифасида:
«Кун тартибидаги асосий савол — Хитой раҳбари Си Цзинпин АҚШнинг Японияга қарши урушда кўрсатган ёрдамини, қонли қурбонликларини ва эркинлик учун олиб борган курашини эслайдими?» — деб ёзди.

У Пекин ва унинг халқини байрам билан табриклар экан, Путин ва Ким Чен Ин билан “АҚШга қарши фитна” уюштирилаётганига ишора қилди:
«Илтимос, Владимир Путин ва Ким Чен Инга энг қайноқ саломларимни етказинг. АҚШга қарши тўқилаётган тўрингизни ҳам унутманг», — деди АҚШ раҳбари.

Хитойдаги парад ва иштирокчилар

80 йил олдин Япония таслим бўлганини нишонлаш мақсадида ўтказилаётган тадбирда Россия президенти Владимир Путин ва Шимолий Корея етакчиси Ким Чен Ин ҳам қатнашмоқда. Си Цзинпин Путинни «қадрдон дўст» деб атади, Ким эса эҳтимолий вориси — қизи Ким Жу Ае билан Пекинга келди.

Геосиёсий аҳамият

Таҳлилчилар фикрича, парадда уч давлат раҳбарининг биргаликда иштирок этиши Москва, Пекин ва Пхенян ўртасидаги ҳарбий ҳамкорлик кучайиб бораётганини кўрсатади. Бу эса АҚШ учун янги чақириқ, Осиё-Тинч океани ҳудудида ҳарбий мувозанатни издан чиқарадиган омил сифатида баҳоланмоқда.

Хитой қудратининг намойиши

Парад чоғида ядро учлиги — қуруқлик, денгиз ва ҳаводаги стратегик кучлар, шунингдек, бутун Ер курраси бўйлаб зарба бериш имкониятига эга DF-5C қитъалараро ядро ракетаси ҳам намойиш этилди. Бу эса Пекиннинг Ғарбнинг глобал бошқарув моделини рад этиб, ўз геосиёсий стратегиясини илгари суришида қудратли сигнал сифатида кўрилмоқда.

Трамп учун сиёсий зарба

Экспертлар Трампнинг бу баёнотини унинг сиёсий позициясига кучли зарба сифатида баҳоламоқда. Чунки у ўзини Путин ва Ким билан дўстлик алоқаларида тенгсиз деб кўрсатиб келаётган, аммо амалда бу учликнинг АҚШга қарши бирлашиши Вашингтон учун жиддий таҳдид бўлиб турибди.