Германия канцлери Фридрих Мерц Sat1 телеканалига берган интервьюсида Россия президенти Владимир Путин ҳақида ўта кескин баёнот берди. Унинг таъкидлашича, Путин “ҳозирги замоннинг энг хавфли ҳарбий жиноятчиси” ҳисобланади ва ҳозирча Украинадаги урушни тўхтатиш ёки тинчлик битими тузиш ниятидан йироқ.

Мерцнинг фикрича, Украинадаги вазиятни ҳал қилиш учун ҳарбий фронтда ечим топиш қийин, аммо иқтисодий жиҳатдан босимни кучайтириш имкони мавжуд. Германия раҳбари Россия иқтисодиётини ҳолдан тойдириш мақсадида Москва билан савдо-сотиқни давом эттираётган давлатларга қўшимча бож жорий этиш таклифини илгари сурди.

Олмон канцлери шунингдек, Путиннинг тинчлик музокаралари ҳақидаги баёнотларига ишонмаслик кераклигини, Кремлга бирор йўналишда ён бериш Европанинг манфаатларига зид эканини таъкидлади.

Путин эса Мерцнинг баёнотига жавобан, Германия раҳбарини жанговар ҳаракатлар учун айбни фақат Москва гарданига юклашда айблади. Россия президенти анъанавий тарзда Украинадаги можарога Ғарб ҳамжамиятини масъул қилиб келади.

Эслатиб ўтамиз, Россия армияси 2022 йил 24 февралда Украинага бостириб кирганидан буён Берлин Кремл сиёсатини кескин қоралаб келмоқда. 2022 йил апрелда Германия президенти Франк-Вальтер Штайнмайер ҳам Путинни “бункерда ўтириб уруш алангалатган шахс” деб атаган эди. АҚШнинг ўша пайтдаги президенти Жо Байден эса Путинни бир неча бор “қотил” ва “ҳарбий жиноятчи” деб атаган.

Шунингдек, 2023 йил 17 март куни Халқаро жиноий суд Путинга нисбатан ҳибс ордери чиқарган эди.