АҚШ ва Хитой ҳукуматлари TikTok ижтимоий тармоғини сотиш шартлари бўйича келишувга эришди. Бу ҳақда CNN телеканали хабарига кўра, АҚШ Молия вазири Скотт Бессент маълум қилди. Унинг сўзларига кўра, битимнинг барча тафсилотлари 19 сентябрь куни АҚШ Президенти Дональд Трамп ва Хитой раиси Си Цзиньпин учрашувида эълон қилинади.
Бессент ҳозирча шартноманинг мазмуни ёки харидорлар ҳақида маълумот ошкор қилишдан бош тортди. Шу билан бирга, у келишувни “энг мураккаб савдолардан бири” деб атади.
Бу орқали икки давлат ўртасидаги TikTok бўйича кўп йиллик тортишувга нуқта қўйилиши мумкин.
Шу билан бирга, Трамп Truth Socialдаги саҳифасида мамлакат ёшлари “жуда сақлаб қолишни истаган муайян компания” бўйича келишувга эришилганини ёзди. У компаниянинг номини айтмаган бўлса-да, бу билдирув TikTok ҳақида эканини англатиб турибди.
Маълумот учун, TikTok Хитойнинг ByteDance компаниясига тегишли. АҚШ ҳукумати Пекин расмийлари америкалик фойдаланувчилар маълумотларини олишга мажбур қилиши мумкинлигидан хавотирда. Шу сабабдан TikTok АҚШда миллий хавфсизликка таҳдид сифатида баҳоланган.
2024 йилда АҚШ Конгресси ByteDance’ни TikTok’нинг Америкадаги бўлинмасини сотишга мажбур қилувчи қонунни қабул қилган эди. Акс ҳолда сервис мамлакатда тўлиқ блокланиши билан таҳдид қилинган. Аввалига сотиш учун 270 кун берилган, кейинчалик бу муддат бир неча бор узайтирилган.
Агар келишув амалга ошса, TikTok АҚШда тўлиқ блокланишдан қутулиб қолади ва Америка бозорида ўз фаолиятини давом эттиради.
