Ўзбекистон ер ости газ омборларини (ЕГО) газдан тўлдириш бўйича ишларни якунлаган. Бу эса қишда газнинг ўчирилмаслигини таъминлайди. Энергетика вазирлигининг маълум қилишича, омборларни газ билан тўлдириш режаси 110 фоизга бажарилган.
"10 кундан бери ЕГОга газ қўйиш амалга оширилмаяпти, тўпланган газдан фойдаланилмоқда. “Газли” ЕГОга 2 миллиард куб метрдан ортиқ газ, Хўжаобод ЕГОга эса 930 миллион куб метрдан ортиқ газ қўйилди", - дея қайд этди вазирлик.
Энергетика вазирлигининг маълум қилишича, Ўзбекистонда куз-қиш даврининг меъёрда ўтиши ҳамда аҳоли ва корхоналарни тўлиқ таъминлаш учун бу даврда ички истеъмолчиларга 32,6 миллиард кубометр газ етказиб бериш режалаштирилган.
Ер ости газ омборлари ўзи нима?
Ер ости омборхоналари газ ишлаб чиқарувчи компаниялар каби деярли бир хил тамойил асосида ишлайди-улар компрессор станциялари ёрдамида ер ости табиий ҳавзаларини газ билан тўлдиришади. Газ 400 дан 2000 метргача чуқурликда сақланади.
ЕГОнинг асосий вазифаси - улар иситиш мавсумида бизнес соҳаси ва жамоатчиликка газ етказиб бериш билан боғлиқ муаммолардан қочиш имконини беради. Хусусан, улар газ истеъмолидаги кунлик ўзгаришларни тенглаштириш ва қишдаги юқори талабни қондириш имконини беради.
