Январда Ўзбекистонда улгуржи истеъмолчилар томонидан 85 млрд сўмлик табиий газдан ноқонуний фойдаланиш билан боғлиқ 614 та ҳолат аниқланди, деб хабар қилди Энергетика вазирлиги. Хусусан, АГТКСларда 20 та ҳолат қайд этилган бўлиб, уларда 76,8 млрд сўмлик газдан фойдаланилган.
Январь ойида Ўзбекистонда улгуржи истеъмолчилар томонидан 614 та ҳолатда умумий қиймати 85 млрд сўмлик 85 млн куб метр ҳажмдаги табиий газдан ноқонуний фойдаланилгани аниқланди. Бу ҳақда Энергетика вазирлиги матбуот хизмати хабар қилди.
Газдан ноқонуний фойдаланиш ҳолатлари қайд этилган:
- Бухоро вилоятида — 37,9 млн куб метр (37,8 млрд сўм);
- Қашқадарёда — 25,1 млн куб метр (25 млрд сўм);
- Тошкент вилоятида — 13,2 млн куб метр (13,2 млрд сўм);
- Навоийда — 3,5 млн куб метр (3,6 млрд сўм);
- Фарғонада — 1,3 млн куб метр (1,2 млрд сўм).
Шунингдек, 20 та автомобилларга газ тўлдириш компрессор станциясида газдан ноқонуний фойдаланиш натижасида 76,8 млрд сўмлик зарар аниқланган. 30 ҳолатда — иссиқхоналарда (1,2 млрд сўм), 39 ҳолатда — ишлаб чиқариш корхоналарида (1,9 млрд сўм), 164 ҳолатда — умумий овқатланиш корхоналарида (0,7 млрд сўм).
Йиғилган маълумотлар ҳуқуқни муҳофаза қилувчи органларга юборилди, дейилади хабарда.
Аввалроқ Энергетика вазирлиги январь ойида Ўзбекистонда 33 мингдан ортиқ хонадоннинг бир ойлик истеъмолига тенг бўлган 5,6 млрд сўмлик электр энергиясидан ноқонуний фойдаланиш бўйича 511 та ҳолат аниқлангани ҳақида маълум қилган эди.
