Ер юзидаги жамики мавжудотларнинг тириклиги бевосита ер билан боғлиқ. Жумладан, инсонларнинг озиқ-овқат ва бошқа қишлоқ хўжалиги маҳсулотларига бўлган талаб ва истакларининг қондирилиши ҳамда турмуш фаровонлиги ҳам она замин саҳоватидан пайдо бўлади. Бироқ сўнги асрларда кузатилаётган табиий иқлим ўзгаришлари ва инсонларнинг хўжалик фаолиятини нотўғри олиб борганлиги таъсирида ерларда кучли шўрланишлар юзага келди. Тупроқдаги тузлар эса қишлоқ хўжалик экинларининг ривожига жиддий зарар етказиб, натижада уларнинг ҳосилдорлигини кескин пасайтириб юборади. Шу сабабдан ерларнинг самарадорлигини ошириш ва қишлоқ хўжалиги экинларидан кутилган ҳосилни етиштириш мақсадида ҳар йили шўр ювиш тадбирлари олиб борилади.
Ўзбекистон Республикаси Вазирлар Маҳкамасининг 2021 йил 8 апрелдаги “Қишлоқ хўжалигига мўлжалланган ерларнинг шўрини ювиш ишларини ташкил этиш бўйича қўшимча чора-тадбирлар тўғрисида” ги қарорида юклатилган вазифалар ижросини таъминлаш мақсадида “Ўзагроинспекция”нинг Жиззах вилоят бошқармаси ва туман бўлимлари томонидан шўр ювиш ишларида сувдан фойдаланиш ва сув истеъмоли тартибига қатъий риоя этилиши юзасидан тизимли назорат ўрнатилган.
Инспекция органлари томонидан шўр ювиш тадбирларида сувдан самарали фойдаланилиши устидан ўтказилган назорат тадбирлари давомида жами 91 та қонунбузилиши ҳолатлари аниқланган. Шундан, 3 та ҳолатда сув тўғридан-тўғри коллектор-дренаж тармоқларига ташлаб қўйилган бўлса,
5 та ҳолатда эса суғориш ишларига етарли даражада сувчилар жалб этилмагани сабабли даладаги сув қаровсиз қолдирилган. Бундан ташқари,
2 та ҳолатда сифатсиз шўр ювиш ишлари олиб борилиб, сув исрофгарчилигига йўл қўйилган, 24 та ҳолатда шўр ювишга сифатсиз ер тайёрланиб, 5 та ҳолатда рухсат этилмаган жойлардан шартномасиз сув олиш ҳолатлари аниқланган.
Мазкур қонунбузилиши ҳолатлари юзасидан инспекция ваколати доирасида 20 та 4 млн 15 минг сўмлик маъмурий ва молиявий жарима санкциялари қўлланилди. Маъмурий ҳуқуқбузарликлар содир этилиши сабаблари ва шарт-шароитларни бартараф қилиш мақсадида корхона, муассаса, ташкилот раҳбарларига 41 та ёзма кўрсатма ва тақдимномалар киритилди. Шунингдек, содир этилиши мумкин бўлган ҳуқуқбузарликларни эрта олдини олиш учун сувдан фойдаланувчилар ва сув истеъмолчиларига 30 та огоҳлантиришлар берилган.
Хулоса ўрнида, шўр ювиш тадбирларини олиб боришда сувдан фойдаланиш бўйича қабул қилинган қонунлар ва норматив ҳуқуқий ҳужжатларга риоя этиш ҳамда оби-ҳаётдан мақсадли, тежаб-тергаб фойдаланиш лозим. Зеро, бу бутун мавсум давомида сув ресурсларига бўлган эҳтиёжни таъминлаб, унинг тақчиллигини юмишатишга хизмат қилади.
“Ўзагроинспекция”нинг Жиззах вилоят бошқармаси
Ахборот хизмати
