Uzbekistan Airports йўловчиларни ўз ҳолига қўймайдиган такси ҳайдовчиларидан халос бўлиш учун пойтахт аэропортида такси фаолияти тизимини кенг миқёсда қайта ташкил этишни режалаштирган.

Бунинг учун тендер ўтказилиб, ягона такси хизмати кўрсатувчи – 2017 йилдан буён йўловчи ташиш соҳасида фаолият юритаётган Bobur Diyor компанияси танлаб олинган. Компания тасарруфида ишлаб чиқарилганига уч йил бўлмаган, фақат бензинда ишлайдиган 100 дан ортиқ маҳаллий ва хорижий енгил автомобиллари мавжуд. Бу аукцион доирасида Uzbekistan Airports томонидан қўйиладиган асосий талаблардан бири эди.

Танланган ташувчи транспорт хизматларини кўрсатиш борасида беш йиллик тажрибага эга. Хусусан, компания аэропорт ва вокзалларда кутиш/кузатиш, курьерлик хизматлари, VIP такси, микроавтобус ва автобусларда хизмат кўрсатиб келмоқда.

Транспорт компанияси аэропорт йўловчиларни ташиш нархлари, шунингдек қўниш залида ўрнатиладиган такси “стойка”си дизайнини шакллантириш масалаларини   Uzbekistan Airports билан келишиб олади.