Ucell ва Ўзбекистондаги бошқа компанияларга эгалик қилувчи Digital Holding ҚК РФнинг Digital Invest асосчисига санкциялар жорий қилинганидан сўнг номини Digital Olding`га ўзгартирди. Шунингдек, янги таъсисчи пайдо бўлди. Бунинг натижасида Digital Invest эндиликда ҚК назорат пакетига эгалик қилмайди.
Ucell уяли алоқа оператори, CRPT Turon маркалаш оператори ва Ўзбекистондаги бошқа компанияларга эгалик қилувчи Digital Holding қўшма корхонаси ўзининг юридик номини ундаги битта ҳарфни олиб ташлаган ҳолда Digital Olding`га ўзгартирди. «Газета.uz» мазкур ўзгаришга эътибор қаратди.
Бу АҚШ апрель ойида Алишер Усмоновнинг USM холдинги ва унга алоқадор компанияларга қарши санкциялар киритганидан сўнг содир бўлди. Шу билан бирга, АҚШ Молия вазирлиги истисно қилиб, агар бу операциялар Тожикистон ёки Ўзбекистонда телекоммуникация хизматларини кўрсатишга қаратилган бўлса, «Мегафон» ёки Digital Invest фойдасига ҳар қандай битимлар, жумладан, Америка товарлари ва технологияларини сотиш учун муддатсиз лицензия берди.
Digital Olding асосчилари таркиби ҳам ўзгарди. Бундан олдин Digital Invest 51% назорат пакетига эга бўлса, ҳозир у 46,1% ни ташкил қилади. 4,9% улушнинг бир қисми Vakdesign (тижорат фаолияти ва бошқаруви бўйича маслаҳат хизматларини кўрсатиш), G-Will (овқатланишнинг бошқа турлари), Malon Commerce (божхона расмийлаштируви ва юк ташиш хизматлари) ва ECAR Dealer`га (ахборот хизмати) эгалик қилувчи Вадим Анатолевич Кимга ўтказилди. Давлат активларини бошқариш агентлигининг улуши ўзгармади — 49%.
Digital Holding 2021 йил август ойида USM Telecom, «МегаФон» ва Ўзбекистон ҳукумати томонидан ташкил этилган. Унинг таркибига Ucell ва USM холдингининг Ўзбекистондаги активлари — CRPT Turon ва ICS Holding Uzbekistan киради. Россия томонидан Digital Invest компанияси, Ўзбекистон томонидан Давлат активларини бошқариш агентлиги иштирок этди. Кейинчалик «МегаФон» USM Telecom`даги ўз улушини Digital Invest`га сотди.
Қўшма корхона Ucell (Coscom) уяли алоқа оператори, CRPT Turon маркалаш тизимининг оператори, телекоммуникация хизматларини кўрсатувчи Pervaya Bashennaya Kompaniya (Coscom билан биргаликда — 99%) ва New Solutions компанияларига эгалик қилади.
