Фарғона вилоятида Хитойнинг Dongfeng автобусларини йиғиш, шунингдек, электрокарлар ва қуёш панеллари учун зарядловчи қурилмалари ишлаб чиқариш режалаштирилган.
Бу ҳақда Фарғона вилояти ҳокими Хайрулло Бозоров Хитойнинг йирик Dongfeng Motor, Luoyang Grasen Power Technology ва Tunghsu Group компаниялари вакилларидан иборат инвесторлар делегацияси билан музокаралар чоғида маълум бўлган.
Хусусан, йиғилишда Dongfeng Motor (Хитойнинг энг йирик автомобиль ишлаб чиқарувчиси) томонидан таклиф қилинган Dongfeng электр автобусларини ишлаб чиқариш лойиҳаси, шунингдек, Luoyang Grasen Power Technology томонидан элекромобиллар учун зарядловчи қурилмалар ва Tunghsu Group компаниясининг қуёш панелларини ишлаб чиқариш ташаббуси кўриб чиқилган.
Dongfeng Motor 4 гектар майдонда завод қурилишининг биринчи босқичига 45 миллион доллар сармоя киритишни таклиф қилмоқда. Автобусларни йиғиш 2025 йилга режалаштирилган. Яна 50 миллион доллар сармоя киритиладиган иккинчи босқичда аккумуляторлар ва бошқа электр автобуслари учун эҳтиёт қисмларни ишлаб чиқаришни маҳаллийлаштириш, шунингдек, ҳудудларда техник хизмат кўрсатиш хизматларини ташкил этиш режалаштирилган.
Хитойнинг энг йирик электр автомобиллари учун зарядловчи қурилмаларини ишлаб чиқарувчи Luoyang Grasen Power Technology компанияси ўз лойиҳасига 30 миллион доллар, Tunghsu Group эса қуёш панеллари ишлаб чиқаришни ташкил этиш учун 50 миллион доллар сармоя киритмоқда.
Барча лойиҳаларни Фарғона вилоятининг Фурқат туманида бошлаш режалаштирилган.
Хайрулло Бозоровнинг маълум қилишича, ҳозирда вилоятда Хитой капитали иштирокидаги 138 та корхона фаолият юритмоқда, 2022 йилда Хитойдан 375,1 миллион доллар сармоя жалб қилинган. Ҳозирда Хитой билан ҳамкорлик 1,2 миллиард долларлик 25 та лойиҳада давом этмоқда.
Шунингдек, вилоят ҳокими бугунги учрашувда муҳокама қилинаётган лойиҳаларни муваффақиятли амалга ошириш учун ҳар томонлама қўллаб-қувватланишига ишонтирган. Томонлар таклиф этилаётган лойиҳаларни амалга ошириш бўйича зарур чора-тадбирларнинг йўл харитасини ишлаб чиқишга келишиб олишган.
