Машҳур россиялик актриса Елизавета Боярская 29-сентабрдан 2-октабргача бўлиб ўтадиган ХV Тошкент халқаро "Ипак йўли марвариди" кинофестивали доирасида мастер-класс ўтказади.
Россия кинематографиясининг энг машҳур актрисаларидан бири, Россия Федерациясида хизмат кўрсатган артист ВГИК (Бутунроссия давлат кинематография институти)нинг Тошкент филиалида мастер-класс ўтказади, унда ҳамма иштирок этиши мумкин, тадбирга кириш бепул.
ХV Тошкент халқаро "Ипак йўли марвариди" кинофестивалида дунёнинг 30 дан ортиқ мамлакатларидан киноижодкорлар иштирок этади. Ҳозирда ишчи гуруҳ тадбирни ташкил этиш ва намойиш этилиши режалаштирилган филмларни танлаш билан шуғулланмоқда. Бу йилги кинофестивал дастурига аввалги иккитасига нисбатан баъзи ўзгаришлар киритилган.
Кинофестивалнинг асосий тадбирлари маҳорат дарслари, эксклюзив кино намойишлари, кино кунлари, Европа Иттифоқи мамлакатлари кинофестивали, "5 кун ичида кино" ёш режиссёрлар танловини ўз ичига олади.
Ушбу даражадаги кинофестивал биринчи марта 1968 йилда Тошкентда Осиё, Африка ва Лотин Америкаси мамлакатлари кинематографиясининг дунёдаги энг йирик форуми сифатида бўлиб ўтган. 1997 йилдан бери фестивал ўтказилмади, аммо 2021 йилда Шавкат Мирзиёевнинг қарори билан афсонавий воқеа қайта тикланди.
